Reserva india
Denomínase reserva india aos territorios dos EUA (en inglés: Indian reservation) ou do Canadá (en inglés: Indian reserve, en francés: réserve indienne) que están baixo a soberanía limitada dunha tribo nativo americana ou varias.
Reservas nos Estados Unidos
[editar | editar a fonte]Nos Estados Unidos, a gran maioría das tribos son consideradas servant nations (nacións domésticas) e viven nas terras tribais tradicionais que se reservaron polo goberno federal como reservas indias, aínda que tamén moitas tribos foron obrigadas a cambiar de localización.
A administración desas terras depende do Departamento do Interior por medio da Bureau of Indian Affairs (BIA) ou Oficina de Asuntos Indios. En California case a metade das reservas denomínanse Rancherías; en Novo México, case todas levan o nome de Pueblos e nalgúns estados do oeste, espacialmente Nevada, hai zonas de nativos americanos que se denominan como colonias indias.
Hai arredor de 326[1] reservas indias nos Estados Unidos, o que significa que non tódalas tribos recoñecidas (máis de 566[1] a nivel federal, en outubro de 2016) teñen a súa propia reserva. Algunhas tribos teñen máis dunha reserva, outras teñen unha compartida e outras non teñen ningunha. Ademais, debido ás adxudicacións do pasado que daban terras a non indios, algunhas reservas están moi fragmentadas, sendo enclaves illados. Este cúmulo de factores crean dificultades administrativas, políticas e legais para as comunidades indias.[2]
A súa área total xeográfica é de 22.700.000 hectáreas (227.000 km2), o cal representa o 2,3% da área total dos Estados Unidos (962.909.099,6 ha). Comparadas cos estados dos Estados Unidos, a maioría son pequenas, porén hai doce reservas indias maiores có estado de Rhode Island que abrangue 314.425 hectáreas, e nove delas son maiores có estado de Delaware (32.761 ha). A reserva de maior tamaño pertence á Nación Navajo sendo semellante en tamaño a Virxinia Occidental. As reservas están desigualmente espalladas por todo o país, a maioría ó oeste do Río Mississippi.[3][4]
Debido a que as tribos teñen certa soberanía, as leis varían dunhas terras a outras.[5][6] Esas leis poden permitir o xogo legal en casinos para atraer turistas. O consello tribal, e non o goberno federal, é o que ten xeralmente a xurisdición nas reservas. Moitas reservas establecéronse polo goberno federal, mais unhas poucas, principalmente no leste, teñen a súa orixe no recoñecemento do estado.[7]
A BIA dividiu a administración das 326 reservas en 12 oficinas rexionais[8] (Alasca, Oriental, Leste de Oklahoma, Grandes Chairas, Medio Oeste, Navajo, Noroeste, Pacífico, Montañas Rochosas, Chairas do Sur, Suroeste e Occidental) que se subdividen en 83 axencias ou zonas. Estas funcionan como intermediarios entre o nativo americano e a BIA, aínda que a miúdo carecen de cooperación e de cartos. Cada reserva correspóndese, normalmente, cunha tribo grande, aínda que as tribos pequenas adoitan se agruparen nunha reserva máis ou menos grande, como a Axencia Everett para os Puget Sound Salish. As axencia encárganse de distribuíren racións, nomear interlocutores, da policía indíxena, fomentar proxectos...; é dicir de tódolos servizos agás os médicos.
Notas
[editar | editar a fonte]Véxase tamén
[editar | editar a fonte] |
Wikimedia Commons ten máis contidos multimedia na categoría: Reserva india  |
Bibliografía
[editar | editar a fonte]- Davies, Wade; Clow, Richmond L. (2009). American Indian Sovereignty and Law: An Annotated Bibliography. Serie Native American Bibliography Series, nº 29 (en inglés). Lanham, MD: Scarecrow Press. ISBN 978-0810862357.
- Kinney, J. P. (1937). A Continent Lost: A Civilization Won: Indian Land Tenure in America (en inglés). Baltimore: Johns Hopkins University Press.
- Sutton, Imre (1975). Indian Land Tenure: Bibliographical Essays and a Guide to the Literature (en inglés). Nova York: Clearwater Publishers.
- Tiller, Veronica E. Velarde (ed.), ed. (1996/2005). Tiller's Guide to Indian Country: Economic Profiles of American Indian Reservations (en inglés). Alburquerque: Bow Arrow Publishing Co. ISBN 978-1885931047.
